史篤城「大」「素」除

史篤城「大」「素」除
 

英超今周壓軸戰係由史篤城主場迎戰紐卡素。史篤城今季主場威力冇以往咁強，但整體演出又唔算差；至於紐卡素就有前冇後，搞到每場波勝負都難以預料，但正因為佢哋咁踢法，梗係捧入球大有着數。（周一13，now621台周二3:00am直播）

史篤城過往一向俾人靠主場食胡感覺，但今季就唔知做乜聯賽一場都贏唔到，先輸俾維拉再不敵李斯特城；但同時間，史篤城其餘時間表現又唔差，作客贏曼城當然係代表作，另外亦迫和到侯城同昆士柏流浪，而喺英聯盃亦連贏樸茨茅夫以及新特蘭入16強，整體演出又尚算唔錯。
陣容方面，史篤城續有謝夫甘馬倫、奧丹維治同約拿芬禾達斯受傷，但費格然一直覺得後者係史篤城毒藥，唔落場好過落場，依家麥克曉士可以用高治拍馬美迪奧夫踢雙箭頭，配合保贊、域陀摩西斯負責進攻，要爭取「士哥」應該唔難。

紐卡素近4場失11球

客軍紐卡素依家聯賽排榜尾，至今一場聯賽都冇贏過，主要原因除咗領隊柏祖冇料到外，球隊有前冇後踢法亦係致命原因；睇番喜鵲近期賽績，近4場都同對手合演對攻戰，場場最少都有4個「總入球」，前線柏比斯施斯、利維亞尼分別喺對侯城同水晶宮賽事梅開二度，腳風好順；可惜另一方面，紐卡素防線雖有荷蘭國腳告魯爾、老臣子高洛仙尼等鎮守後防，但近期失波都同倒水冇分別，近4戰場場失最少兩粒，加埋總共失咗11個波，球隊今晚更有阿比特、大衛辛頓同賴恩泰萊等守將因停賽或受傷缺陣，自然更有利開出入球大。