曼城讓和厲兵秣「馬」

曼城讓和厲兵秣「馬」 

歐聯E組今晚最強戲碼，自然係曼城主場迎戰羅馬比賽。曼城首戰臨尾香輸俾拜仁，今晚有主場之利下再無失分空間，好彩藍月亮最近有林柏特大勇，喺呢位歐聯經驗豐富老將帶領下，預計曼城可小勝防守力十足嘅羅馬，「讓和」值博。（周二5，有線64及203台周三2:45am直播）

曼城上輪作客拜仁，滿以為可以守到完場攞到1分，點知最尾俾謝路美保定一腳靚波搞到冇晒3分，正因為咁，曼城今晚返主場再戰實在唔可以再有任何差池，如果唔係想出線就非常困難。
好在，曼城喺上輪失利後，返到本土比賽已證明冇失到信心，球隊先喺圍攻對手下打和車仔，再連勝錫周三以及侯城，當中加埋入咗7球，而當中最大功臣就係今夏「借用」嘅老將林柏特，佢喺幫曼城迫和舊會車路士後，喺對錫周三同侯城賽事再入咗3球，近況大勇，而最緊要一點，係林伯過往幫車仔征戰多季歐聯，仲攞過冠軍，經驗豐富下絕對有助穩定軍心；至於陣容方面，曼城目前仍有祖維迪等傷兵，但領隊柏歷堅尼同右閘薩巴列達，喺上輪坐完波監後今晚都可以復出，另外迪米捷利斯估計亦會取代上場對侯城時錯漏百出嘅文加拉，同隊長甘賓尼鎮守中路，藍月亮攻守方面都值得信賴。

羅馬14次訪英國僅1勝

客軍羅馬今季賽績真係好嚇人，球隊喺意甲連歐聯全部贏晒，加埋仲只失過兩球，當然有人會話意甲近年水準下滑，羅馬贏晒冇乜特別；不過咁，羅馬上輪分組賽可以主場5:1大破莫斯科中央陸軍，就證明球隊喺歐洲亦絕對有一戰之力，千萬唔可以睇少。
講到羅馬咁好，但今晚依然唔敢貼佢哋，事關呢支意大利球隊過往出訪英國都係凶多吉少，過往14次到訪僅1勝，其中3度造訪曼徹斯特更全部輸晒，數據對佢哋好不利，故就算中場迪羅斯上輪坐完波監可以復出，曼城該仍可小勝攞3分。