首爾下盤仁「者」無敵   亞冠盃去到4強次回合階段，首回合西悉尼流浪者作客悶和FC首爾，但今晚主客互換，其實就算失一球都一定要贏先出到線，球員壓力反而仲大；事實上，流浪者喺新球季開始後（澳足盃對阿德萊德城）加埋4場只入兩球，鋒力麻麻，而最具質素新援卡斯迪倫由於未有註冊，單靠杜米祖歷未必可以爭取到「士哥」，要讓波唔值博。（周三2，now670台周三5:30pm直播） FC首爾上場主場悶和流浪者，搞到教頭兼前南韓國腳崔龍洙都大鬧前線表現欠佳，好彩以佢威望，首爾球員相信都會聽話，喺今晚回復真身；再者，首爾今晚僅得後備尹日祿因征戰亞運唔打得，其餘主力好似艾華頓山度士、梅里斯奧摩連拿及艾斯古迪路都可候命，有受讓唔怕買。