卡爾萬：哈化史特加鬥守獻細

今晚德甲獨腳戲上演下游對決，由哈化柏林主場迎戰史特加。早前防線形同虛設嘅哈化，近期成功修補缺口，今場更有後防核心尼高舒侯斯復出壓陣，相信唔易失波。對手史特加炒體育總監波碧後，成績穩步上揚，教頭艾明費賽前話明會以主守戰術應戰，既然兩軍都着埋同一條褲玩防守，揀1.78倍入球細冇走雞。

（有線61及201周六凌晨2:30直播）

哈化後防大將復出
哈化開咧頭4場聯賽猶如不設防，每場起碼失兩球波。直到前仗鬥禾夫斯堡，憑前鋒沙洛文卡勞入波打開聯賽勝利之門之餘，更首次保持清白之身。雖然哈化緊接以0:1輸畀奧格斯堡，但失嗰球12碼極具爭議性，僅負證明條防線進步咗唔少，加上後防主將尼高舒侯斯坐完波監復出，防守唔成問題。可惜嘅係哈化顧得後又顧唔得前，失波同入波數字成正比，之前頻頻入波嘅朗尼希巴臣、舒希巴近兩場冇晒料到，主守行先都幾難多波入。

對手史特加早前炒咗體育總監波碧後，先係作客賽和多蒙特，繼而擊敗漢諾威敲響聯賽勝鼓。不過值得留意嘅係，包括伊比斯域、夏歷、菲臘高斯迪治在內所有攻擊球員，踢咗咁多場都未開齋，今場又有中場派牌能手迪維達因傷缺陣，想入波難度頗大。再者史特加主帥艾明費賽前話，佢上季教法蘭克福作客哈化輸過1:6，吸取過教訓今場會偏向穩守，入球細自然係明智之選。