修咸頓「熱」心開讓客

修咸頓「熱」心開讓客
  
今晚英超戲碼甚強，除咗車仔鬥阿仙奴，以及曼聯撼愛華頓之外，其實熱刺主場硬碰修咸頓都一樣夠睇頭！事關熱刺新帥普捷天奴就係從修咸頓撬過嚟，但修頓搵嚟朗奴高文帶領下，表現令人驚喜，論近況更絕對喺熱刺之上，孫公睇好修咸頓有權喺熱刺主場偷雞，「讓客」捧得過！（周日30，now622台周日9:05pm直播）

修咸頓季前俾人大解體，當大家以為佢哋今季實要喺榜末掙扎，殊不知成績卻眼前一亮，開咧至今只輸過一場，更排喺聯賽榜次席，新領隊朗奴高文應記一功，因佢從荷甲引入中場杜辛泰迪治及前鋒加斯安奴柏利，表現之佳絕對可代替拉爾拉拿及歷基林拔離隊後嘅空缺，難怪解體後嘅修咸頓反而更進一步啦！
熱刺從今場對手修咸頓撬嚟普捷天奴任教，成績只屬中規中矩，連同聯賽盃及歐霸在內，近7戰1勝4和2負；球隊最大問題係前鋒艾迪巴約陷入球荒，季初8月贏昆流之役入波後，到呢刻再未有進帳，普帥又唔信另一前鋒蘇爾達杜，而哈利卡尼又尚待磨練，搞到隊波現時首席射手竟然係比利時中場查迪尼，可想而知熱刺攻力有幾疲弱。今戰熱刺主場遇上狀態大勇嘅修咸頓，難言穩勝，捧對家「讓客」更划算。