赛前分析：皇家马德里巴塞隆拿惊世大战

皇家马德里巴塞隆拿惊世大战

咬人苏刑满复出 全球聚焦

万众瞩目嘅西班牙国家打吡今晚爆发，「银河舰队」皇家马德里喺主场火併联赛榜「一哥」巴塞隆拿，而今仗焦点中嘅焦点梗係「咬人苏」苏亚雷斯刑满复出，等咗咁耐，终于可与美斯同尼马「三剑合璧」，组成「南美最强锋线」扑击同样星光熠熠，由近况弗到冇朋友嘅C朗领军嘅皇马。呢位因喺世盃咬人搞到一身蚁嘅乌拉圭前锋，饿波咁耐一「放监」誓要尽骚哥利，两军攻力都咁强，大盘当然係首选！

三剑合璧强战C朗

近年国家打吡嘅主要剧目，离唔开双方「男一」C朗与美斯永无休止嘅大斗法，其中C朗摆脱伤患后重上高峰，喺上周皇马作客大胜利云特省两粒后，开季8场联赛上阵7次已经轰入15球，打破尘封76年嘅西甲前8轮入球纪录，连埋周中欧联作客利物浦又先开纪录，呢位葡萄牙万人迷喺近9场正式赛事入咗17粒，真係着晒火，而皇马众星如宾施马、占士洛迪古斯、却奥斯亦渐入佳境，协助皇马连赢8场杀声震天，主场入波完全冇难度。

虽然美斯喺今季西甲只入7粒，冇C朗咁抢镜，但呢位巴塞王牌今季转型成功，喺头8轮为队友送出7次助攻，并带动队友尼马、拿杰迪锡等更加够胆入楔埋门，使「地上最强」攻击点分散，令对手防不胜防。不过今仗最大焦点，绐终係「苏神」苏亚雷斯登陆西甲后首度登场，呢位喺世盃时咬伤基亚连尼被罚停赛4个月嘅乌拉圭前锋，以8,100万欧元天价加盟，成为今夏转会市场嘅标王，足足等咗4个月终可为新东家披甲，仲要咁啱撞正作客死敌皇马，「发晒牙痕」嘅阿苏必定施展浑身解数，用入波回报巴塞嘅信任。

作客难保清白之身

大家可能话巴塞今季8场联赛、合共720分钟保持不失，智利门神哥迪奥巴禾与法国守将马菲奥来投后，令防线稳阵咗好多，但斯维觉得只因之前嘅对手如伊巴、华历简奴、毕尔包之流攻力太曳，实在难对巴塞后防构成威胁，今仗出战「银河舰队」先至係真正考验，相信佢哋再冇零封皇马嘅能力。

两条欧洲最顶级锋线正面交锋，势必火花四溅，况且「三哥」皇马现时落后榜首巴塞4分，只要赢波便可追贴「地上最强」，挟地利梗係全面抢攻，随时合演入球骚，大盘不容错过。