歐國盃: 德國讓主「直」搗黃龍

德國讓主「直」搗黃龍 2014年11月14日 

足智彩好醒呀！直布羅陀之前輸過兩次0:7，今晚佢哋喺歐國盃外圍賽D組作客德國，讓球主客和盤口正正就係德國讓7球，鑑於主隊實力超凡，「讓主」呢個任務絕對可以「直」搗黃龍。（周五8，有線64及203台周六3:45am直播） 

直布羅陀上場分組賽以0:3不敵格魯吉亞，初哥首度出戰歐國盃就連輸3場，暫時仲未取得入球，但已經失咗17球，坦白講，都係大家意料之內啦，而且最初兩仗分別以0:7嘅相同比數不敵波蘭同愛爾蘭，今仗對德國受讓7球可以理解。 

直布羅陀缺最佳球員 
今次大軍嘅外流球員，仍然係威爾斯球隊巴拉城後衛艾迪爾、英格蘭低組別球隊嘅法斯利、派利史迪利、布里斯托流浪中場積克高士寧，同埋普雷斯頓後衛威斯文，真係講出嚟你都唔識，而最大名氣嘅球員、前曼聯青訓丹尼希堅保咸，就因為冇班落，早前已經宣布退出直布羅陀國家隊。
德國喺分圍賽可謂出閘脫腳，雖然率先擊敗蘇格蘭，但之後就輸俾波蘭同埋賽和愛爾蘭，搞到目前喺D組只能排第3位，是役喺主場遇弱旅直布羅陀，相信都係時候重振聲威，以一場大勝去提升士氣次餘，亦要重奪粉絲們嘅歡心，大屠殺可期。 

眾拜仁骨幹可以候命 
曉姆斯、舒韋恩史迪加、達斯拿、奧斯爾，同埋舒賀爾尼都因傷未有歸隊，不過皇家馬德里中場基迪拉傷癒後重新入選，一眾拜仁骨幹好似馬里奧葛斯、湯馬士梅拿、謝路美保定同埋紐亞亦有列陣，仲有皇馬中場卻奧斯同埋阿仙奴嘅普多斯基，咁嘅人腳夠殺有餘啦！
足智彩好醒，讓7球即係要德國贏得多過波蘭同埋愛爾蘭，不過德國又的確有咁嘅能力喎，所以「讓主」熱到得1.48倍可以理解，贏硬點解唔買？