葡萄牙「尼」料開讓主 2014年11月14日  葡萄牙喺歐國盃I組將會再上征途，今晚主場迎戰阿美尼亞，勝利3分照計可手到拿來，畢竟客軍近況插水，已經接近半年未試過喺國際賽贏波，是役買葡萄牙開「讓主」可以排隊等收錢。（周五11，有線62及202台周六3:45am直播）  費蘭度山度士終於取得上任葡萄牙後第一場勝仗，球隊上次作客以1:0擊敗丹麥，今仗返回主場出擊，點都要食住個勢大步向前，基斯坦奴朗拿度會繼續喺前線領軍，布拉加前鋒艾達盧比斯、拉科魯尼亞射手普斯迪加、士砵亭翼鋒拿尼、摩納哥中場摩天奴，仲有皇馬中堅比比全部入選，前車路士右閘保辛華更獲重召，已經有半年未喺國際賽贏波嘅阿美尼亞，難阻葡軍開「讓主」。（利添勝）