英總盃：地頭龍修咸頓夠贏有特_東方日報

英足盃第4圈重賽，修咸頓回師主場再戰屈福特，兩支英冠球隊實力接近，上次交鋒屈福特主場與修咸頓踢成1比1未分勝負，不過「聖人」主場威力強勁，近9場主場全勝，今仗修咸頓贏面高企，主勝屬信心之選。（周三凌晨3時45分開賽）

修咸頓近況出色，唔單止主場勁，所有賽事已經23場未輸過，錄得16勝7和，亦係隊史最長不敗紀錄，上場擊敗洛達咸後排英冠次席，同緊列斯聯及葉士域治爭奪直接升班資格，2017世青盃冠軍功臣之一嘅阿當岩士唐係球隊進攻命脈，呢位英格蘭射手今季大爆發，聯賽累積15球11助攻，今場又要睇佢表演。

屈福特射手啞火
至於屈福特上場0比1輸畀卡迪夫城後，現時排英冠11位，佢哋近4場3和1負，對住中下游嘅錫周三及布里斯托城都贏唔到，而且近兩場都冇波入，進攻啞火，首席射手米列達拉祖域已經5場食白果，對住主場特醒嘅修咸頓，機會難免看淡。