美冠盃：守住美斯捧邁亞密半和_市民日報

中北美洲冠軍盃4強次回合，國際邁亞密主場再鬥溫哥華白帽。邁亞密首回合作客輸0比2，今場不但非勝不可，仲至少要贏兩球先有價講，任務艱巨，至於手執兩球嘅溫哥華白帽就睇定嚟食，佢哋防守硬淨，近5場作客全開半場和，今場實擺定鐵桶死守，一於再追半場和。（周四早上8時開賽）文:邪神

國際邁亞密雖然擁有美斯等前巴塞球星助陣，每次登場都關注度十足，但畢竟佢哋年紀一大把，好難再踢出昔日高峰水平，佢哋上圈對ＦＣ洛杉磯，首回合又係作客先輸0比1，次回合返主場贏3比1驚險晉級，估唔到今圈又係咁，而且首回合作客輸到0比2，想好似上次咁反勝就難好多。

白帽領先兩粒擺鐵桶陣
就算有「球王」光環，國際邁亞密都唔係想點就點，睇番溫哥華白帽近績，佢哋現時係美職總積分「1哥」，近8場4勝4和不敗，作客表現亦出色，近7次作客3勝4和不敗，包括今屆中冠盃作客墨超勁旅蒙特雷同普馬斯都打和2比2，今場對住邁亞密，絕對有能力頂住唔輸，半場守和就更加輕鬆，半場和捧得過。