Ｕ21歐國盃：意大利精銳盡出搶頭啖湯_東方日報

Ｕ21歐國盃A組賽事，意大利Ｕ21迎戰羅馬尼亞Ｕ21。兩隊實力有一段距離，意大利曾5次奪冠，同西班牙並列賽史捧盃次數最多球隊，屬傳統爭標分子。雖然佢哋近年成績欠佳，但爛船始終有三斤釘，加上近5場正式賽事錄4勝1和，當中4次上半場已經領先，一於博半場主勝。

（周四凌晨3時開賽）文:Mic少

意大利Ｕ21人腳唔曳，當中更不乏大國腳，包括近兩場世盃外都有上陣嘅中堅迪亞高哥普拿。此外列斯聯翼鋒韋費特干洛圖、前車路士中場卡沙迪及羅馬新星尼高路比斯尼都有入選，可謂精銳盡出。當中以韋費特干洛圖最值得留意，佢今季為列斯聯上陣46場，射入9球及6次助攻，成為列斯聯重返英超嘅功臣，加上曾為大國腳上陣13次，見慣大場面，勢必令對手防線疲於奔命。

羅馬尼亞Ｕ21質素輸蝕
羅馬尼亞Ｕ21之前僅4次出席Ｕ21歐國盃決賽周，近2屆都係分組賽出局，上屆更加3戰0入球，名副其實屬陪跑分子。隊內大部分球員喺本土搵食，質素自然唔及意大利，今場遇着急先鋒小意軍，半場落後絕不為奇。