今屆U21歐國盃論實力及星味，英格蘭無疑佔優，呢支上屆冠軍以強陣展開衞冕，多位主將效力英超勁旅，包括利物浦中場哈維艾利洛、中堅查洛爾昆沙、曼城中場占士麥艾迪等新星。呢班「幼獅」長期喺高水平賽事磨練，年紀輕輕已經大戰經驗豐富，屬於冠軍首選。 至於論往績及穩定性，西班牙亦相當出色，「鬥牛兵團」過去7屆獲得3冠2亞，可見西班牙青訓工作非常優秀。美中不足係拉明耶馬等部分適齡球員冇份參賽，否則優勢更大，西班牙可以作為冠軍次選。 法國有泰爾不可忽視 其他冠軍選擇方面，德國U21徵召大國腳禾達美迪助陣，呢位史特加射手喺早前歐國聯4強擔任正選，功架十足，德國過去4屆有3屆入決賽，其中2次捧盃。此外，法國擁有被拜仁慕尼黑外借去熱刺嘅前鋒馬菲斯泰爾，同樣屬於一股不可忽視爭標勢力。