巴甲：尼馬要停賽山度士作客捱細界_東方日報

聽朝巴甲下游對決，福塔雷薩主場鬥山度士。山度士有王牌尼馬坐波監，進攻全面熄火，造訪同樣唔識入波嘅福塔雷薩，捧2.5球細盤。

（周五早上6時30分開賽）文:法達斯維

老牌勁旅山度士前季恥辱性降班，雖然今季重返巴甲，仲搵埋尼馬回巢幫手，但明顯係噱頭多過實際效果。呢位球星近年走下坡，重返山度士後表現非常平庸，上場對保地花高仲使出「上帝之手」入波，但偷雞不成更攞埋第2張黃牌被逐，最終球隊輸0比1，依家跌落尾3，尼馬賽後喺IG向球迷道歉，不過佢同山度士合約今個月尾到期，今場仲要坐波監，上場隨時成為告別戰。

事實上，尼馬加盟山度士後，各項賽事上陣12場入得3粒，單計聯賽4次披甲食白果，完全幫唔到手，難怪山度士11場聯賽贏得2場，而各項賽事近7場僅入2球，全開2球或以下，淪為下游都好合理。

主隊福塔雷薩同樣低迷
主隊福塔雷薩都唔好得幾多，雖然佢哋比山度士高1位，但各項賽事近6場2和4負未贏過，仲有5場交白卷，論攻力同山度士不相伯仲咁弱，見到都唔開胃。今場「海軍鬥水兵」格局，入球細係明智之選。