外圍賽：克羅地亞搶韁半W好路_東方日報

世盃歐洲區外圍賽L組上演榜首大戰，捷克主場硬撼克羅地亞。捷克今仗背城借一，不過「格仔兵團」最鍾意速戰速決，可趁捷克主攻玩偷襲，盡快鎖定勝局，半場客勝捧得過。

（周五凌晨2時45分開賽）文:法達斯維

捷克焗攻易出事
查實捷克個頭開得唔錯，頭5輪取得4勝1負，唯一敗仗就係輸畀克羅地亞，依家兩軍同得12分，不過捷克打多1場兼得失球稍遜，連埋今仗雖然仲有3輪要踢，但如果能擊敗競爭對手，對爭取首名直接出線席位好有利，今仗必定藉地利搶攻，只係近年碰頭捷克都未贏過，焗攻隨時得不償失。

不時畀人話青黃不接嘅克羅地亞，之前連續6屆大賽都能躋身決賽周，包括近兩屆世盃闖入4強，獲得1亞1季，絕對係超額完成。「格仔兵團」喺L組開局更靚，頭4輪贏晒不特止，仲狂轟17粒及僅失1球，攻守兼備，老而彌堅嘅隊長莫迪歷，今季轉戰意甲加盟AC米蘭依然有貨賣，配合加華度爾、比達蘇錫等，質素遠勝捷克。

老實講，克羅地亞確係老將偏多，主帥達歷為咗慳力，經常採取先發制人嘅策略，務求早早領先，去到中後段可慢慢收起老將，睇番佢哋之前4場全部上半場取得領先，並成功由頭贏到尾，今仗可反客為主，半場客勝有計。