英超：軍心回穩拉隊歎私房菜 利物浦搶分客W開餐_東方日報

今晚英超焦點之戰，賓福特主場火併利物浦，上季王者利物浦上場歐聯大勝法蘭克福5比1，總算打破4連敗困局，可望重振軍心及士氣，今仗遇上「私房菜」賓福特，更加係搶分好機會，勢必乘勝追擊。雙方近5次交鋒，利物浦獲得全勝，客勝值得追捧。（Now 621及611周日凌晨3時直播）文:Mic少

利物浦早前英超及歐聯，先後不敵水晶宮、加拉塔沙雷、車路士、曼聯，一度令人懷疑「紅軍」盛世玩完。幸好原來只係「技術性調整」，上場歐聯即使先失波，但仍然反勝法蘭克福5比1，被網民嘲諷為「貴價水貨」嘅域斯大踢身價波，貢獻兩次助攻，呢位德國國腳重拾水準，「紅軍」攻勢更加有侵略性。

雖然前鋒阿歷山大伊沙克、右後衞謝利美費林邦上仗傷出，但「紅軍」人腳充裕，尤其是伊沙克一直表現欠佳，佢缺陣之下，用艾基迪基擔任單箭頭，進攻更有效率。利物浦現時落後榜首阿仙奴4分，不容再失，否則一旦被拉遠積分距離，衞冕就會非常困難，今仗作客必定搏盡全取3分。

賓福特遇強即屈
至於賓福特上場作客能夠擊敗韋斯咸，主因係對手處於頹勢，不宜高估，其實球隊往往遇強即屈，包括10月初主場不敵曼城。同埋賓福特今夏剛出售3位主力麥比奧莫、基斯甸洛加特、尤尼韋沙，整體實力受削，隨住球季不斷推進，以現時人腳恐怕難以喺漫長球季維持高水平發揮，今場面對剋星利物浦，好大機會再次落敗。